Page 527 - ebook.msu.ac.th

๕๑๖

กับทั้งฝูงชาติเซื้อ นางนาถกินนรี

บินทางบน ดั่งกันไปได้
อันแต่แนวคนนี้ อย่าหวังคึดอ่าว
ท่อแต่ไกลาสชั้น ชาวฟ้าจิ่งเพียง แท้แล้ว

พระก็ เสวยราชท้าว หลายขวบมึนนาน
พญาจิงมีแนวนาม ซื่อชายแทนหน้า
อันว่า กุมารน้อย สีดาแนวแม่
ซื่อว่า รัตนาถท้าว เหมือนแท้พ่อตน นั้นแล้ว
พระก็ ให้ท่อนท้าวอยู่สร้าง เมืองพ่อจ้าปา

แทนบุญเฮือง พ่อตนสมสร้าง
อันว่า กุมารน้อย ปทุมาสองอ่อน
คือดั่งฮูปพ่อผู้ บุญกว้างเกิ่งกัน

สองอ่อนน้อย เป็นคู่เคียงเสนห์
เลาคีงโสม สิ่งกันปานแต้ม
อันว่า ทันย้าแก้ว กุมารตนพี่
เสวยแห่งห้อง เมืองแท้แม่ตน

อันว่า น้องแก่นไท้ อินทะราชกุมาร
เสวยกาสี ย่าตนแทนสร้าง
อันว่า กุมารแก้ว สีไวน้อยอ่อน
คือพ่อแก่นไท้ บุญกว้างแปดโสม

พ่อแต่งให้ คัชชเนตรโดยนาม
ซื่อเป็นศรี สืบนามแทนไท้
อันว่า จอมกษัตริย์ไท้ อาลัมตนปู่
พ่อก็ขอแก่นไท้ กุมารน้อยปูกแทน

ไปอยู่สร้างย่านกว้าง แทนปู่นครศรี
ดีท่อเสนาหลาย แห่หุมเอาท้าว
ภูมีเจ้า ยายไปปุนปูก

ยศยิ่งกว้าง ลือท้าวทั่วแดน
ทุกเทศท้าว ลือเดชเขาขาม
แดนแต่ในชุมภู ก็ท่อลือซาเจ้า แท้แล้ว
นับแต่เสวยเมืองได้ พันปีตามชาติ
เจ้าจิ่งมรมิ่งเมี้ยน เมือฟ้าสู่สวรรค์

อันว่า ฝูงไม้เท้า ทั้งราชศรีคันไชย์ ก็ดีท้อน
อินทาเมืองสวรรค์ ลวดเอาเมือไว้
อันว่า ภูมีเจ้า คัชชนามตนประเสริฐ

แม่นพระผู่แก่นไท้ เป็นเจ้าแห่งเฮา นี้แล้ว
อันว่า ไม้ฮ้อยกอฮ้อยต้น คือดั่งสารีบุตร