Page 97 - ebook.msu.ac.th

๘๖

ทั้งเทวีมารดา แม่นางนงน้อย

กับทั้งดูกไพร่ฟ้า ฝูงหมู่เสนา

ทั้งชาวเมือง คู่คนกองไว้
กับทั้ง สัพพะสัตว์สิ่งพร้อม ม้ามิ่งงัวควาย

ทั้งพายสารมุงคุล ซู่ตัวกองไว้ หั้นท้อน

๏เมื่อนั้น เขือก็โดยค้าเจ้า จอมหัวมีอาชญ์
ขาบพระบาทเจ้า ลงห้องแห่งปาง

เขือก็ได้มีดพ้า ดวงอาจพระขรรค์ไชย์
ถือลงไป เบิ่งงูทางท้อง

เขือก็แหวงูฮ้าย ยักข์หลวงตัวใหญ่
ตั้งแต่คอฮอดท้อง เถิงเท้าฮอดหาง

คือเฮาท้าปลาแส้ ดุกโดปลาค่อ นั้นแล้ว

เอาไปตากแดดไว้ ปลาแห้งกี่กิน เจ้าเอย
เขือจิ่งเก็บดูกไว้ ทุกสิ่งทั้งมวล

เอามากองกันดู ท่อภูเขาน้อย

แต่นั้น บาคานท้าว คัชชนามตนอาจ
พระเล่าลงจากห้อง ไปซี้ดูกผี

เลือกเอาดูกพระบาทเจ้า ทั้งแม่เทวี
ดูกสนมนารี แบ่งกองกันไว้

ทั้งดูกเสนาท้าว ชาวเมืองไว้ส่วน
สัพพะสัตว์สิ่งช้าง กองไว้ห่างกัน

ท้าวก็จิ่งยอปายไม้ มุงคุลซี้ดูก แท้แล้ว

๏แต่นั้น พระบาทเจ้า เมืองกว้างเกิดมา หั้นแล
กับทั้งเทวีแก้ว จอมเมืองทะรงแท่น

เสเนตรท้าว บ่เหลือแท้เกิดดอม

นางสนมน้อย นารีกับเกิด
บ่มีหลออยู่ได้ เมืองกว้างเกิดดอม

ชาวเมืองพร้อม ญิงชายพื้นแผ่น
สัพพะสัตว์ช้างม้า เต็มพื้นแผ่นทะลัง นั้นแล้ว

บ่ได้หลอเหลือได้ หมูหมาเป็ดไก่
คือดั่งพระบาทเจ้า คองสร้างตั้งแต่หลัง เจ้าเอย

บ่มีข้าเขือกฮ้อน มวลมี่เต็มเมือง